شاعر ابتومان..

امیرالشریفی :هذول بیت مدلول یاهلهم افهم من شایبهم واحمارهم مایرد احصانهم بس الله منطیهم عدهم افلوس ومتغنعرین ویتصدرون بالمجالس الیوم تذکرت سالفه منهم وگلت اکتبهه یمکن تفیدکم.. العام صارت فاتحه صوب بیت الموله ورحنه ,شفنه الشاعر حسون العبیدی* صعد المنصّه واول هوسته گام یحمد ابحجی طنبور ابن مدلول وگال :(بیت مدلول النشامه اسباع یوم الموزمه..#وابحدهم ماطارت طیره#)والرمّای شعل السمه بالرمی,واحد چان ابصفی منهه لله یحچی,گال احترگت عین امک وابوک ابیوم جاعد اتصعّد ابناس مایعرفون یمنتهم من عسمتهم وشتحصل؟

گتله یاخوی هذا المهوّسچی گبل لایصعد دحسوهن ابجیبه هسه ایسویهم علینه اسود القادسیه بین های السوالف و یابو الینازه و المهوسّچی بالش بینه الماو ما الماو لایبرد… وشد میدانک.. والرمی خذانه..,هذا الی ابصفی گال صاحبی هسه انحوّش چیله خل انتکتّر ابعید الله لایستر علیهم هم الزین المیت ماشرد..,بعد اشوی بطّل الرمی وخلص الیزل ودفنَو المرحوم الله یرحمه(بلکت ربک.. ونکره ونکیر یحسبون الچیلات ابمیزان حسناته)من خلّص الیزل شفت المهوّسچی یهوی وادری بی یشرب و یدوّرله مکان ..

انا اویا من قبل واحد چان یعارف الثانی رحنه صوبه گتله حی الله الاستاذ ماتعبت الحقیقه شدیت المیدان گال بالخدمه خویه بس هذول اهل الفاتحه مانطونی افلوسی گتله ان شاءالله ینطونک الان ملتهین بالوادم بس عندی سوال انت بیت مدلول تعارفهم? هذا المرحوم واید حمدته من قبل هم چنت تعرفه؟

گال لا خویه مااعارفهم ولاگاعد اویاهم..بس انطونی تواصیفهم وانا نظمت هوسات علیهم! (ابگلبی گلت هسه انت محد انطاک تواصیف المبصطات بالسوگ,محد دلّاک بالعسر والجور فی المدن والقری,محد عرّفک بالتاریخ.. ماتشوف الناس عافو لسانهم وثقافتهم وهویّتهم العربیه…هذا المرحوم ابیتهم محد چان ایطَیّطله وایکشخل ابوجه الخطار وانت الیوم سویته حاتم الطی علینه)!گتله الله یوفقک بس اذا ترید تعرف حجی طنبور ابن مدلول ذاک هوه الی لابس بشت وگاعد بالصدر علی الاقل خاطر تشوفه مکان اخر تعرفه گال حشاک طمره الطگّتّه هسه هذا یحل یربط؟

گلت له زین مدام تدری ابهای السالفه لیش هلگد حمدته؟ گال اترید الصدگ ابنه اسمه احبیتور اجانی وانطانی افلوس گال ارید تکتب هوسات علی ابوی واناهم هوّست علیه (ابگلبی گلت طیّح الله صبغک من های السوالف هذا الشعب ماراح یتطوّر وعایش بالاوهام والتفاخر والناس گامت تتکاتل علی الصیت والعمام والاخوان شی عافت شی ) الحقیقه من شفت های المهزله گلت:

اگعد صوب باب العِز واحفظ صیت چفّیتک

اشینفع اتّصدّر فوگ ومتعلّی ابمزویتک

الهیبه ماهی بالهوسات و ماصار الرمی صیتک

الخیّر ناسه ایشهدوله