سوالف فارقین ؛ انا و حجیه اندیمه

امیرالشریفی : اهل گبل خوش عدهم امثال ..یگولون المایسوگه مرضعه سوُگ الحچی ماینفعه وهذا المثَل یتطَبّق علی کثیرین فی المجتمع قبل فوگ مئه عام صاب الناس فی المنطقه طاعون ومئات الالاف من الناس انقتلو لان ماچانت شبکات تواصل اجتماعی ووضع صحی وطبی جیّد واکثر الناس کانو فی جهل عن مایدور فی العالم وبلاد الاخری

لکن الیوم کل الناس فی العالم عدهم اطلاع علی مخاطر کرونا وکل قنوات الاخباریه العالمیه والاطباء یصیحون یاناس راعو ولاتجتمعون ولا تخرجون من البیت الاعند الضروره وللاسف البعض نشوفهم خارجین من الریِل.مااطوّل علیکم های حجیه اندیمه تعرفونهه واید تفتهم .امس شفتهه اتلوم بالباب واتگول امنین اجتهم های المصیبه .گلت الهه خیر ان شاءالله حجیه اشصایر

گالت هذا زایر احبیتر صوب خوالنه کاضهه من تالی ویسوی گعدات وجایب ربعه مدری امنین بیهم کرونا وعدَو الناس وهای چم یوم طلّاعهم مایطلع والدیره امسوینهه حجر صحی(قرنطینه) .گلت:الله یکون ابعونهم بس حجیه ذاک الصوب چم عرس ابعرس کضو وجمعو الناس هذول مابیهم واحد یفتهم ینصحهم لایسببون مشاکل الهم وللناس گالت هو المرحوم حجی یویلی چان کاض عصاته ویعارچ علی شبر الگاع وهذول خلفته هم واحد یز.. والثانی یلطش .اتگلمن وتحاچیمن

گلت الهه الک الله یزرع الدیِم .هسه هذا زایر احبیتر ماعلیه عتب.بس ذاک المخَوّر لوماکضوله عرس چان الدنیه انگلبت. ذاک الیوم هم واحد توفی اهناک ولمّو الناس والیزاله وبالفیلم کون شایفه المهَوّسچی یصیح وماهو ملحج( الزمر لایبرد وعینک علی الموگد والدلال).ونص الیزاله من های شرب النوارجیل لو یرکضون قدمین یفحطون عباره شاربین مای توله علی گولتهم واظن الرمّای هم چان امخومر مایعوّل اتخلص الفاتحه ویدوّر له مکان یگعد یشرب والمرحوم هم بعد مابینه نستغیبه الله یرحمه.گالت یدّه انت لیش تطلع بالغبره وتحچی همّ یاهو الی تکضه یگول بس انا وبس وحسبالهم الکباریه والهیبه ابهل سوالف
ماچذب المرحوم ملافاضل من گال:

خصال التنحمد تنوجد عدمن       الفهم عدیاقسم یازلم عدمن

التحنبط والجهل چم حید عدمن    العگل حط صاحبه فوگ الثریّه

گلت ای والله صدگ ،بعض هذول الی متصدرین وعلی گد مطی مایفتهمون کون یتعلمون من حجیه اندیمه …رسول الله ص چان مایکلّف اهل النایبه ومایحب الریاء وهای التجمعات الضخمه بالفواتح والطبخ والمفطّح والرمی.. رسومات جاهلیه وبس للاسم وخارجه عن اطار الاسلام .الیوم الکرونا جبرت الناس علی تبیعه سیره الرسول فی عدم تکلیف اهل النایبه وعدم الریاء بس هم بیهم قلیلین یتَزرون الحبل ومایفهمون مخاطر کرونا هذول کون اتطگ روسهم بالصخر یاالله یقنعون والله حچی باحترام ودلیل مایفیدهم. الله یبعد شر هذا الوباء من العباد ویرحم کل اهلنا ویستر علیهم و طبعا کرونا فیها رحمه وحکمه من الله سبحان وتعالی الحمدلله